莊思明飛陳司翰戀楊明 上樓蜜會一粒鐘

2016年05月10日 23:21
東網電視
更多新聞短片
莊思明戀上楊明呀!

無綫藝人莊思明(Lisa)2011年開始同歌手陳慧琳嘅細佬陳司翰(Victor)拍拖,期間「明翰」曾經被影到喺中環吵大鑊,之後Victor仲懶理Lisa,攬女仔朋友條腰!佢哋兩個成日傳分手,又離又合,早前「明翰」畀人影到去韓國旅行,但之後又再傳出分手。不過,呢次Lisa今次真係決心斬纜,而最爆嘅係,個男主角竟然係無綫力捧小生楊明!就咁睇,佢哋兩個冇咩交集,只係喺《愛.回家》合作,但尋晚《東網》獨家影到佢哋兩個甜蜜翹手返男方屋企「蜜會」,一粒鐘之後仲約埋無綫幕後去九龍城打邊爐,相信「雙明」嘅情侶身份喺朋友圈中已經係公開嘅秘密!

楊明近年被力捧

楊明曾經喺劇集《娛樂反斗星》度,扮謝霆鋒扮得勁似,非常引人注目!佢又曾經同索腿天后陳敏之拍拖,但分手之後緋聞就冇乜,去到2013年,佢宣布同圈外女友Joanna結婚,當時仲影埋婚紗照,打算去美國舉行婚禮,點知婚事最後搞唔成。據知當時楊明因為拍劇,搞到婚期一拖再拖,最後分手收場!近年,楊明專心工作,一劇接一劇,喺劇集《收規華》度做第二男主角,而楊明依家就身在深圳,拍攝王晶嘅新劇《賭城群英會》,尋日佢為咗宣傳劇集《火線下的江湖大佬》而返香港。

發現記者分頭走

楊明同Lisa拍拖冇耐,依家仲係蜜月期,尋日出完宣傳活動之後,佢就車岑麗香同樂瞳去長沙灣,之後九秒九返中環會女友!Lisa上車後就開車去尖東,期間「雙明」喺車上頭貼頭傾偈,勁煙韌,逗留咗五分鐘後又開車去紅磡,落車之後,Lisa主動翹住楊明隻手,勁嬌勁嗲,仲上咗楊明屋企「歡」聚一粒鐘!溫馨過後,「雙明」再次出動,楊明拖住行李落樓,之後同Lisa去便利店買嘢飲「解渴」,再坐的士去九龍城會合一班無綫幕後工作人員打邊爐,當中仲有同楊明傳過緋聞嘅藝人龔嘉欣。期間佢好似發現記者,去到凌晨十二時許,楊明戴住口罩落樓,一名女同事幫佢拖篋上的士走人,五分鐘後Lisa先落樓走人!

承認戀情

《東網》打畀楊明,起初佢唔係好想講,佢話:「等我遲啲返嚟先講啦!」幾經追問,佢終於承認戀情:「係,我哋係一齊,都係啱啱開始啫!畀啲空間我哋,其實不嬲都覺得思明係好女仔,拍完《愛.回家》大家都多咗見面、溝通,經過了解先一齊,其實都唔係好多人知道我哋一齊。(都一齊出去同朋友飯局!)咁啱有個同事生日,咁啱一齊食飯啫。(真係乜都咁啱?)我哋都冇親口講大家關係,唔知同事知唔知!」

而Lisa呢,佢就好大方,直認同楊明熱戀中,又話同Victor劃清界線,佢以短訊回覆:「我同司翰喺幾個月前已經分開咗,只想低調處理感情事,所以冇公開講,我倆祝福彼此日後會過得更好,希望對方幸福快樂,這次以後所有關於他的報道我一概不會回應,同樣地所有關於我的報道大家也不用問他,謝謝!至於我同楊明的事,下次見到大家時回應清楚,感謝大家關心。」

最強娛樂APP《東網巨星》,不時推出最新最好玩娛樂節目,除了早前推出的特備節目《發哥有Say》、《黎明話你知》外,每個禮拜都仲有好多其他精彩娛樂節目。如果鍾意韓風嘅,集中介紹最新韓劇、韓片同韓國最新歌曲嘅《韓劇榜》,同埋Highlight每周韓星訪港精彩片段,以及報道韓國演藝圈最新動態嘅《韓風吹》絕對啱晒你。仲諗咩呀!快啲Download啦!

最強娛樂APP「東網巨星」下載連結:
http://on.cc/redirect/entertainment