宋熙年影貼紙相呻貴　陳智燊晒嬲豬合照

圈中情侶宋熙年與陳智燊（Jason）一向恩愛，去年男方更求婚成功，婚禮定於今年底舉行！早前兩人雙雙飛到故鄉澳洲拍攝無綫節目《星星探親團》，宋熙年今日上載喺澳洲影貼紙相時嘅照片！佢留言話：「有時，人生係需要帶點童真，而童真的代價就係$18澳幣」18蚊澳幣即係大約港幣100蚊，未嫁人嘅佢已經持家有道，咁慳家唔捨得揮霍，果然非常錫住未婚夫個荷包呀！

而陳智燊亦有上載女友嬲豬嘅相，留言：「that face says it all…$18 aussie dollars…（齋係塊面已經講晒要講嘅嘢……18元澳幣……）」見到Jason一面開心樣，對錢銀咁大方，一凹一凸，宋熙年應該笑番至係！