趕返港排舞台劇　法拉紐約直播搬「竇」

藝人陳法拉目前身在紐約修讀為期四年嘅戲劇碩士課程，而嚟緊7月法拉將會與男神黃子華合演舞台劇，可謂萬眾矚目，唔少粉絲爭住撲飛！

原本今日係法拉第二個學年嘅Last day，所以佢就要執好晒個化妝間，下一個學年就會轉去另一個化妝間。期間法拉喺Facebook玩直播，同一大班網民一齊執嘢，甫開始佢先同大家say個hi，之後佢就介紹呢個小小化妝間：「呢個位坐咗一年，每一日、每一堂有十分鐘可以坐喺個位度，可以睇書、食飯、休息，個位唔係好大。」

不捨小天地

化妝間內仲貼滿唔少老師及同學送上嘅鼓勵信同賀卡，而法拉都話好唔捨得呢個「小天地」。最後，法拉就話好快會返香港，準備同黃子華綵排舞台劇：「好快，呢幾日收拾好我嘅書枱，好快我就會返香港排練我下一個節目，就係我嘅舞台劇，大家有冇買飛呀？買唔買到飛呀？」