自家飾物戴上身　徐子珊登台順便做生意

藝人徐子珊以大使身份出席「香港星級品牌2016啟動禮」，正準備網上售賣珠寶創業的她笑指藉此行取經，透露其網站預計於七月面世。

剛於早上才從美國登台返港的她，表示登台期間戴上自己設計的手鍊，沒料卻因此順道做生意，她謂：「有位男士見到我條手鍊好鍾意，話想買嚟送畀太太，樣樣都想買，仲話等唔切我個網站Run，最後我以正常價賣咗畀佢。（係咪Fans？）唔知，但佢有睇我個騷，慶功宴有嚟，話畀驚喜太太，但佢太太其實喺旁邊，不過我都好開心，登台賺錢之餘又可以做到生意，有人叫我下次戴晒自己設計首飾上身賣。」

讚新公司好

而自由身一段時間，原來子珊近日已落實簽約邵氏與王祖藍合作的經理人公司，她謂：「其實只係差在簽約呢一步，但佢哋都好好，好似今日個活動係之前接嘅，佢哋都畀助手同司機跟我。（主力拍電影？）未知，要等祖藍返嚟傾吓未來方向，年期方面係合理嘅。(合約有冇唔畀拍拖、結婚同生仔？）冇呀！有啲咁嘅嘢咩，到時咪接其他嘢囉！不過都係唔好講，我未簽架，費事一陣加呢個條款落去。」