中島裕翔醉爆攬中女　驚動警察

日本尊尼組合Hey！Say！JUMP的22歲成員中島裕翔，早前同年長廿歲0既女星吉田羊鬧母子戀，雖然獲事務所放生接拍新劇，點知佢又闖禍，被雜誌《週刊文春》被踢爆喺街頭醉酒攬中女，更一度驚動警方！

據雜誌爆料，中島裕翔喺被影到同吉田羊連過7晚夜之後0既第二日，亦即係上個月1號嘅朝早，有一名年約30幾嘅女子報警，話喺街頭被一名男子抱實。警方到場之後發現，原來呢名男子竟然係中島裕翔。據知當時中島飲到醉晒，警方有向佢落口供，而女方最後亦放過中島，冇落案起訴佢。

而尊尼事務所方面向雜誌承認確有此事，並為事件向外界道歉，而中島裕翔本人事後亦有深深反省。