撻著尊尼仔惹禍　吉田羊新廣告粉碎引退傳聞

憑參演木村拓哉孭飛影視系列《律政英雄2015》上位嘅日本女星吉田羊，上月初被雜誌踢爆撻著比佢年輕20載嘅尊尼偶像組合Hey！Say！JUMP成員中島裕翔後，一直盛傳兩人會被處分，不過中島獲事務所放生，日前宣布有新劇拍，而吉田羊就被指今後被尊尼事務所列入禁止旗下藝人合作嘅黑名單，近日更有傳佢被事務所雪藏，隨時冇得撈，秋天仲會引退藝能界。

不過今日吉田羊就同人氣童星鈴木梨央有新嘅能量飲品廣告曝光，唔少粉絲都喺網上留言話見到佢有新工作即刻安心。廣告入面吉田羊同梨央齊齊挑戰彈夏威夷小結他，本身有學開結他嘅梨央輕輕鬆鬆就彈完一首歌，仲話同吉田羊一齊玩得好開心。