℃-ute九展開騷晒廣東話：香港冇得彈！

成軍11年嘅日本偶像女團Morning娘（魔娘）師妹組合℃-ute，今日喺香港九龍灣展貿中心Music Zone開首個港騷，五位成員矢島舞美、中島早貴、鈴木愛理、岡井千聖和萩原舞現身即講廣東話冧粉絲：「香港嘅朋友大家好！等咗好耐終於到今日，非常期待，大家一齊High！」佢哋跳唱《世上最Happy的女孩》等歌曲炒熱氣氛，中途更有搞抽獎環節，送咗簽名盒裝紙巾、Postcard、即影即有相同T恤畀幸運粉絲，之後佢哋問中獎嘅粉絲最鐘意邊個成員，幾乎人人都答鈴木愛理，令其他隊友即時扮冇癮。

講廣東話冇人明

其後℃-ute表演不時繼續講「好鐘意你哋」等廣東話冧粉絲，不過隊長矢島舞美講咗幾次「好期待今日」都講到一舊雲冇人明，最後佢話好唔甘心，仲要講到大家聽得明為止。

大晒性感

而全場換上4套衫嘅佢哋，又以露臍性感造型登場，而安歌環節上，五女興奮同台下全部歌迷大合照，大讚：「香港冇得彈！」佢哋仲非常有心，用廣東話讀信贈粉絲：「今日非常多謝大家嚟到我哋嘅演唱會，冇諗過喺香港聽到咁多尖叫聲。」之後更全隊成員一齊講：「我愛你哋！」令全場粉絲瘋狂尖叫，演唱會結束之後佢哋同全場歌迷舉行擊掌會。