姜知英香港拍寫真　擘髀攞火龍果騎呢擺甫士

韓國女團KARA前成員姜知英近年去咗日本發展，人氣有增無減，先後接拍連續劇《民王》同漫畫改編電影《暗殺教室》等大熱作品，而佢將會喺下個月推出相隔一年半嘅第二本個人寫真集《美 Gently》，今次寫真集由著名攝影師Leslie Kee操刀，除東京之外，仲去咗香港、泰國同京都拍攝，今日率先公開幾張靚相宣傳造勢，換上幾套低胸裙騷事業線兼大晒美腿嘅知英盡展成熟性感魅力，不過其中一張相，佢擘髀上陣兼將一個火龍果放喺下體位置大擺甫士，相當騎呢！