張智霖靚靚「遲死」宣言　1日點擊破百萬

藝人張智霖（Chilam）同袁詠儀（靚靚）早前就夫妻檔去拍內地節目《一路上有你》第二季。好少有咁喺人前放閃嘅佢哋，喺最新一集節目入面講到生死，靚靚下令老公：「這件事很重要，你要比我遲死，我不想看到心愛的人離開，所以你要注意身體健康！」Chilam聽到即刻忍唔住想喊，唔少網民留言表示太催淚，而長達約10分鐘嘅精華片段被放咗上網之後，一日已經錄得超過百萬點擊率，今次可以話放閃成功！

唔敢翻睇怕勁喊

依家喺內地拍電影嘅Chilam接受電話訪問時話：「我唔敢睇番，驚喊到收唔到聲。主題係『假如只餘24小時』，大會叫我安排十樣、八樣嘢同太太做，最記得其中一樣係我哋互相為對方畫畫，感覺好似用筆尖觸摸對方嘅輪廓一樣，我覺得好有意義，但可能片長關係被cut咗，真係有啲可惜。」

節目入面Chilam向靚靚送花，又孭起靚靚行路，「臨死」前又擔心對方日後嘅生活費，成功氹得老婆多次眼泛淚光，場面超感人。另外，8月27日生日嘅Chilam計劃當日到上海舉行演唱會，實行與眾同歡。