林峯最靚仔？吳千語：其實對得耐……

藝人吳千語到荔枝角宣傳新片，她說：「戲中有韓星李敏鎬，我都唔知佢遲吓會唔會嚟香港，但我睇牙齒啲姑娘就話如果佢嚟，畀啲首映飛佢哋。（你都迷李敏鎬？）我對呢啲嘢冇乜太迷（韓風），但《太陽的後裔》都有睇過吓。（只迷男友林峯？）見得太多靚仔，冇乜太大感覺，李敏鎬畀我印象開朗、健談、友善。我都冇乜同韓國演員保持聯絡，言語不通。（林峯唔畀？）唔會，佢都好多friend啦！（睇嚟睇去都係林峯最靚仔？）答乜都唔得，陷阱問題，其實對得耐，靚唔靚都唔再重要，最緊要係性格。」

朋友嗌佢做BB

千語又爆經常與林峯孖公仔出席朋友聚會，她說：「除咗女仔聚會，基本上佢都喺度，我哋啲朋友都見過晒啦，有幾多個啫？（廣布朋友綫眼？）已經太公開，路人都睇住啦。（朋友稱呼你峯嫂？）冇咁誇張，都係叫BB。」

未聽過《葉問4》計劃

她又提到早前與林峯遊澳洲，她說：「佢玩咗跳降傘，佢想挑戰自己，但我畏高。（有冇留意康城有張《葉問4》海報？）聽講過有呢件事，但未聽到任何計劃，公司今年都有其他計劃。（恒指升5百點，你有冇斬獲？）我冇時間睇住啲投資，怕自己會miss咗時機，所以我情願投資買樓，穩定啲。」