家人公認？西脇綾香@Perfume傳戀諧星

日本人氣女子電音組合Perfume嘅27歲成員西脇綾香，繼早年與同門樂隊ONE OK ROCK主音TAKA傳緋聞後，今日盛傳搭上較她年長13歲嘅當紮諧星組合Savanna成員高橋茂雄！

最新一期《女性Seven》雜誌喺上月中某夜，拍到高橋趁工作之間有兩小時空檔，趕往一間位於惠比壽嘅高級日式燒肉店，匯合綾香及綾香嘅媽咪同妹妹一齊開派對，同場仲有Perfume另外兩位成員大本彩乃同樫野有香，但高橋由於要趕開工需中途離席，步出店家後佢面露微笑，似乎好開心，而隔咗一陣先見到綾香離開。

其實高橋出咗名係Perfume嘅超級粉絲，去年曾經喺電視節目模仿組合名曲《Polyrhythm》舞步，佢更加係負責綾香嘅部分。而去年10月，綾香同高橋曾被目擊到新宿伊勢丹男士館「濕平」，有同場客人形容全程係綾香為男方揀衫，但當其他客人發現身份，兩人就立即彈開，至於差不多時期開始，綾香經常去欣賞高橋嘅搞笑演出。

雙方所屬事務所向雜誌澄淸只係好朋友關係，但有網友表示如戀情屬實係值得支持，另有網友就覺得兩人似好朋友居多。