泊車買麵包遭鎖車　細細粒被罰320蚊

藝人陳嘉佳（細細粒）與朋友開車到黃埔處理保險事宜，期間因太肚餓落車買麵包而遭鎖車，最後被罰款320元，才可解鎖取車離去。

細細粒事後接受《東網》訪問，她笑言這個麵包太貴：「我當時真係好肚餓，見到有包賣，即刻泊低架車，我已經唔泊雙黃線嗰邊，泊咗另一邊，但我真係唔知嗰度係私家路，同朋友一齊落車去買麵包，然後去個廁所，返嚟就鎖車！（有冇理論？）講極都唔肯軟化，我試過機場泊低車去廁所都有張警告紙攝喺車頭，佢哋又冇警告紙喎，仲叫話等多24小時第二日先交錢就罰雙倍！我咪交咗320蚊就算囉，收據都唔攞啦，佢要我等十幾分鐘喎，我梗係唔等啦，下次惟有小心啲！」