王浩信爆肌撼老婆YoYo「股惑」照

藝人陳自瑤（YoYo）同老公王浩信（Vincent）早前就飛咗去越南度假，Vincent仲親自幫老婆拍咗一輯性感三點式「晒股」沙灘相，仲上載上網開心Share，當然吸到唔少Like啦！咁啱《東網》又有一篇關於YoYo做瑜珈晒纖腰嘅專訪一齊出街，YoYo見到都有轉發，仲留言話：「謝謝！」之後老公Vincent見到，仲留言用圍頭話大讚老婆：「呢巧能蟹喎！（你好能幹喎）」

可能Vincent見到老婆出「股惑」出得咁開心，自己都忍唔住要爆！爆嘅意思係自己都要爆吓肌畀大家睇，剛剛佢就喺微博上載咗張半裸自拍晒肌肉，留言：「太陽啊！我等你好久了！你終於來了，我好想你啊！給大家一點溫馨提示，越南五月真的是雨季，不得不信！」網民見到，都話佢哋兩公婆一個型，一個索，真係冇得輸！