【賣to摸撈】張如城最新力作滾動全國
20160528
東網電視
更多新聞短片
「章魚城」事隔5年終於返嚟喇！簡直係完全冇令大家失望呀！
有亞洲神童之稱、28歲嘅張如城，喺2001年「出道」時出過首《愛意》，2008年佢再推紅歌《友誼的光彩》嚟支持北京奧運，2011年佢又作咗首《中國的巨龍》，佢憑獨特嘅唱腔、詭異嘅音準、懾人嘅台風、騎呢嘅舞蹈，加上對創作嘅熱誠，深受香港人愛戴，仲同佢改咗個名叫「章魚城」，嚟歌頌佢添。
真心製作 全國取景
等咗5年！足足5年！章魚城終於帶咗佢自己作曲作詞嘅新歌《紅日之火》返嚟喇！MV一放上網，即時HIT爆所有社交網站同討論區，MV中，佢連換幾個Look，Chok到爆！佢走遍全中國取景，去咗萬里長城、賽車場、廢墟、爛海皮、崖邊、沙漠等地，仲出動埋跑車同航拍。最威水嘅係，落重本出動N個舞蹈員，有索女、有中佬等等，但係個個hea跳咁款，動作極唔一致，不過重要咩？就係咁先突顯到章魚城架嘛！
今次章魚城似乎想挑戰難度，全曲嘅歌詞都勁翹口，完全唔押韻，九唔搭八，喺MV度佢仲勁貼心咁將啲字幕中英對照，今次佢嘅歌詞有齊廣東話、普通話同英文，佢啲普通話同英文讀音有幾準，大家都好清楚架喇！「My Tomorrow」變「賣to摸撈」，Opening嘅「Open the Sky」都聽到網民R晒頭，有人話聽完成首歌，都搵唔到個Beat，咁有娛樂性嘅歌真係會愈聽愈開心，城城真係冇得輸呀！
充分體現佢對音樂嘅執着及熱誠
等足5年能夠再欣賞到城城嘅「杰」作，網民梗係好有反應啦，雖然MV喺網上就停咗留言功能，不過大家都對章魚城「愛愛愛不完」，用自己嘅方式留言歡迎佢，呢份濃厚嘅愛意簡直賺人熱淚！唔少網友對於章魚城重返樂壇，紛紛表示「好滾動」，仲大讚佢夠晒誠意，指佢今次首新歌又係自己填詞及作曲，而歌詞更流露住佢熱愛創作嘅心，好似「我愛上愛上創作，突然神來一筆，像紅日之火完全燃燒我」，充分體現佢對音樂嘅執着及熱誠。
難怪網友一LOOP再LOOP，聽到上晒腦，仲話要用嚟做電話鈴聲，每次有人打嚟就「Open the Sky」，睇嚟新歌有潛質做新一代洗腦神曲喎！網友讚完歌詞之後，又力讚章魚城嘅歌喉始終如一，更有另類睇法話佢「高音甜、中音準、低音勁」，聽完佢唱歌會「尋回迷失嘅自我」，堪稱人生導師！另外，有網友大呻唱K唔見有章魚城啲神曲，冇得高歌盡興，同時都戥佢唔抵，話晒佢都係亞洲神童，紅遍網絡界，希望之後有得唱啦！
網民有話兒：
LXX LXX LOK：我居然聽左（咗）兩分鐘
Kin Sxx：正呀喂！樂壇就係需要呢D（啲）咁有才華嘅人
Johxxx Lxx：後面班dancer hea到...
KATXXXHO：高音甜、中音準、低音勁，城城唱歌仲係咁正！
XXX允河：已做手機鈴聲。
YUKILOXX：每當迷惘之際，聽到城城的聲線，我就會尋回自我。
LeuXXX2：唱K度冇城城之前首神曲《中國的巨龍》，真可惜，城城咁紅竟然都冇得唱，希望今次有得唱啦！
C_CAMXXXX：好感動，熱愛創作既（嘅）城城返嚟，又係自己填詞同作曲，不愧為音樂神童！
最強娛樂APP《東網巨星》，不時推出最新最好玩娛樂節目，除了早前推出的特備節目《發哥有Say》、《黎明話你知》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！
最強娛樂APP「東網巨星」下載連結：