粉碎有B傳聞？蒙嘉慧拗腰踢走肥腩

現年42歲嘅藝人蒙嘉慧（Yoyo）婚後減少幕前演出，搞到一班影迷心掛掛，而Yoyo最近接拍咗電台嘅處境劇，日前佢出席活動時，一向纖瘦嘅佢被發現身形發福不少，唔少網友笑佢「幸福肥」，仲話以為佢會一世食唔肥！

正正因為咁，激發咗Yoyo減肥嘅決心！Yoyo今日喺微博晒健身照，相中佢邊拗腰邊笑住望鏡頭，睇落好輕鬆，相信減磅難唔到佢，Yoyo仲好有決心咁話：「認真mode。」網友都留言為佢加油，眼利嘅佢哋仲話Yoyo做得呢個拗腰動作，睇嚟可以排除佢有B嘅可能性。