欅坂前成員搞師生戀　男教師被罰減薪1個月

日本女團欅坂46挾乃木坂46師妹之名，今年4月推出首張細碟《Silent Majority》，喺日本大賣26萬張，人氣火速上升。不過，去年尾組合未正式出道前，17歲前成員原田麻由爆出疑搞師生戀，多張被阿Sir摸胸及咀嘴嘅不雅照外洩，最終被炒離隊。

至於涉事嘅31歲男教師松岡幸一，噚日亦被東京都教育委員會罰減薪1個月，調查報告更表示佢曾經同時追求同校另外兩名女同學，邀請對方約會同睇夜景等。雖然松岡已經喺噚日主動提出請辭，但網民批評教育委員會罰則太輕。