【無聲勝有聲】劉愷威晒牽手相證情不變

楊冪今日旋風式襲港為兩歲囡囡慶生，雖然呢位事業心重嘅媽咪行色匆匆，但唔代表佢唔用個heart嚟同個女慶祝。啱啱，劉愷威就喺微博晒咗張「一堆手」喺度切生日蛋糕嘅相，眼利嘅大家，除咗發現嗰堆手入面隱約見到隻小手外，仲有一對好黑、同一對好白好清雅嘅手。

對番今日威仔同楊冪現身機場嘅相，威仔右手度確係有粒癦，而楊冪嘅指甲亦都好似呢張相嗰對玉手一樣咁粉紅。見到威仔緊緊牽住楊冪嘅手，再齊齊捉住囡囡嘅小手切蛋糕，呢一幕真係溫馨到唔識用文字同言語形容；而威威咁樣晒一晒，亦都用行動同相片證明咗，佢同冪冪係情不變嘅。

而網民見到呢一幕，當然都感動到爆裂啦，仲紛紛留言祝威威同冪冪要「永遠好好的」。其實今日威威雖然咁忙，但都依然對愛妻冪冪管接管送，就算佢哋冇公開做任何熱情嘅互動，都Feel到佢哋仲係好真心關心對方。