經歷兩度中風　西城秀樹做物理治療頂硬上

70年代殿堂男歌手西城秀樹，當年憑住一曲《YOUNG MAN(YMCA)》唱到街知巷聞。不過，近年西城秀樹健康麻麻，喺2003年及2013年經歷過兩度中風後，外界對佢嘅健康都非常擔心。不過，已經61歲嘅佢依然冇放棄唱歌事業，嚟緊秋天仲會舉行紀念出道45週年嘅巡迴演唱會。

為備戰演唱會，原來過去一年西城秀樹一直有接受物理治療，佢日前着住「YMCA」T恤，喺醫師帶領下接受為時約兩個小時嘅關節、韌帶嘅訓練。雖然辛苦，但西城秀樹依然頂硬上。完成訓練後，佢又接受強化按摩，期間一度痛到佢臉容扭曲大叫。