藝人陳展鵬在尖沙咀出席「劍橋英文考試中心推介禮」，正拍攝無綫新劇《乘勝狙擊》的他就指七月中才會拍畢劇集，又指天口愈來愈熱有晒要工作辛苦的心理準備。談到與林夏薇的親熱戲份，他坦言拍得七七八八，又謂合乎電視尺度：「點勁都唔夠細個睇發哥、嘟姐勁！」不過較粗俗的對白減得就減，因此現在拍劇有綁手綁腳的感覺。

談到有指歌手鄧穎芝曾為ViuTV拍攝節目《G-1 格鬥會》，而被無綫飛出新劇，展鵬就指未有聽聞：「應該係公司同唱片公司嘅Deal，公司機密嘢我唔知喎。」至於不少前亞視藝人都能在無綫亮相，他就指兩者不能相提並論。

談到行內競爭大，展鵬直言香港所有行業都面對同樣挑戰，而最近不少藝人回巢為無綫拍劇，他就指實屬好事，問是否不怕機會被爭走，他即謂：「我哋作為晚輩，超越唔到前輩，畀個獎我都冇意思。」又謂例如廖啟智、羅嘉良等演員，實力無容置疑。問會否效法羅家良北上闖蕩，他笑謂：「我細細個就浸夠喇，依家大樹好遮蔭，我條路係調轉咁行！」