林峯愛豪飲　千語被催婚親戚幫手搵陪月

女星吳千語出席護膚品牌活動，趁機欣賞現場魔術表演。她透露品牌老闆在法國有酒莊，邀請她到當地參觀。問是否酒量不錯？她笑說：「OK！幾飲得。（有冇投資酒？）佢（男友林峯）有我冇，佢都買幾多酒，佢飲得多過我，佢飲好多，但我新陳代謝快過佢，我第日冇事。（佢飲醉會點？）講好多嘢囉，好囉唆，講好多人生道理，我飲醉都好Crazy，會出去跳舞，試過喺意大利一間酒吧，我買咗兩支香檳，一有人行埋嚟我就斟畀人，雖然語言不通，但係好開心！飲完酒係熱情啲！」

陪未來老爺慶祝

問父親節如何慶祝？她表示屆時會在上海工作，但會預早設飯局慶祝。問會否跟林峯父親吃飯慶祝？她說：「自己爸爸同佢都會食，兩邊分開食囉，但就唔會買禮物，因為男人都冇乜嘢要，買衫又唔知Size。（送酒？）我對中國酒認識唔多。」

談到早前被《東網》拍到跟林峯父母吃飯冇偈傾？她說：「咁啱影到我哋行出嚟，食飯嗰陣有傾偈，如果佢哋喺香港都經常食飯。（有冇催你哋結婚？）我之前有個親戚生咗BB ，親戚話個陪月幾好，可以幫手Book定，我話十劃都未有一撇。（有冇結婚計劃？）未急住，最近身邊好多人結婚，我覺得未準備好，未有呢個諗法，佢（林峯）都未有，佢嚟緊唔喺香港，會好忙。」

至於大忙人林峯正身在大陸為古裝劇《六扇門》做宣傳。