期待做港姐評判　黃心穎恨跟隊出Trip

藝人黃心穎到中環為無綫節目《區區開伙》任嘉賓，她坦言有留意新一屆港姐面試，她說：「我有睇呀，尋日睇住啲即時新聞，都有好多高學歷嘅靚女，記得話有個女仔落的士，條腿好長，有啲笑容又好，係有幾個衣着Casual咗啲，面試應該着斯文啲嘅，或者佢哋想突出自己性格。（有冇啲覺得個樣似你？）有個好似叫Jacqueline呀？人哋話似，我覺得少少啦。（似你有冇着數？）你話呢！我好期待可以做評判，又好想現場睇香港先生選舉，最好公司派我跟出trip，我好耐冇出埠啦！（有冇提名朋友參選？）我身邊女仔朋友超晒齡，男仔就睇佢哋自己意願啦！」