Becky復工眼濕濕：想談一場唔傷害人嘅戀愛

一向形象正氣嘅日本混血女星Becky，今年初同上位樂隊極品下流少女嘅已婚主音川谷繪音被爆不倫戀，令做「小三」嘅佢要停工兼痛失所有廣告合約，事業一舖清袋。Becky上月接受完SMAP成員中居正廣訪問試水溫後，今日終於正式復工，為佢主持嘅音樂節目錄影。

Becky喺錄影前先接受傳媒訪問，亦係佢自今年1月6日舉行開記招謝罪後再見傳媒。著住白衫藍裙嘅Becky，表情緊張，佢向記者鞠躬道歉。佢眼濕濕話好感激終於可以復工，今後會由零開始努力。佢又話已經同川谷斬纜冇聯絡，今後只想談一場唔會傷害到人嘅戀愛。