延續家駒的愛　世榮Paul合唱全場High爆

由葉世榮發起、紀念Beyond已故主音黃家駒的慈善紀念演唱會今晚在會展舉行，多位歌手輪流上台表演，包括草蜢、太極等人，其中太極唱出《大地》及《Amani》等歌時，全場High爆企起身大合唱。之後輪到今晚發起人世榮出場，全場即刻尖叫歡呼，唱完《我是憤怒》後，他說：「High唔High呀？知唔知今晚係慈善演唱會？大家嚟呢度係做緊善事，現場有捐款熱線電話，希望大家快啲打電話！」之後黃貫中（Paul）出場，全場又尖叫，他Guitar solo後，他與世榮合唱《金屬狂人》，唱後世榮表示：「好耐冇同Paul一齊玩，多啲玩！多謝今晚有兩個朋友，同Beyond好好關係，記唔記得五人時期嘅劉志遠？佢特登由台灣飛過嚟，同埋監製Gordon（歐陽燊）。每一個時期我有唔同理想，啱啱夾Band嗰陣就想夾好Band，獨立時期就想寫好啲歌，依家就想將家駒嘅愛延續落去！」之後他們再合唱《再見理想》。

「做呢個騷過程唔容易」

唱完世榮表示：「做呢個騷過程唔容易，中間好多困難，但我唔怕困難，多謝好多朋友支持，包括歌手樂隊、Paul，舊年第一時間打畀佢，佢即刻爽快應承。」Paul就話：「幾廿年朋友，好爽快，真係要多謝前面嘅你哋，就算我哋幾有天份都好，如果冇你哋支持都冇用，轉眼三十幾年，多謝大家！」之後世榮行去打鼓位，全場尖叫，Paul笑他：「曾經有過敲擊小王子綽號嘅葉世榮先生，差啲唔記得佢呢個綽號。」之後他們演唱《灰色軌跡》。

全場向家駒講生日快樂

唱完後世榮行番出個台，並表示：「大家好懷念我打鼓嘅時候，我都幾懷念，雖然我好多理想，但唔會唔打鼓！」之後再與Paul合唱《光輝歲月》，唱到《海闊天空》時，全場又一起大合唱及舉手機當螢光棒，唱完後台上播出家駒的舊照。之後世榮表示：「今日係咩日子？既然係家駒生日，係咪要有禮物？一齊同佢講生日快樂！」Paul亦謂：「要好大聲上面先收到，用盡你哋所有嘅力氣！」之後兩人發動全場講「家駒，生日快樂！」然後便離場。

此時現場播出家駒聲帶，內容為：「收到，好開心，會一路彈，彈到彈唔到為止，希望大家繼續支持我嘅隊友。」最後大會播出世榮為此活動創作的《延續》MV，為演唱會劃上完美句號。