藝人李施嬅、蔡思貝、賴慰玲及孫慧雪等於觀塘宣傳無綫劇集《純熟意外》。期間提到施嬅被指遭思貝搶戲而淪為閒角？她澄清由頭到尾只是客串該劇，又否認與思貝不和：「我只係客串喺海報都咁大頭，幾好！（介意被指淪為閒角？）我不嬲接劇都唔睇戲份，只睇角色有冇得發揮。（戲份有出入？）有都正常，唔會因為思貝所以減我戲。」

未有離巢打算

施嬅又大爆與無綫尚有約兩年合約，故暫未有離巢打算：「我兩年前續咗，依家仲有兩年幾合約。」同場該劇監製陳耀全表明冇偏心任何演員，又讚施嬅是有份量的演員：「佢角色好緊要，我要搵個有份量嘅演員去演，佢發揮得好好。（有傳蔡思貝寫紙仔冧你？）假㗎！」