林志穎想返老還童陪仔仔玩

「台灣男神」林志穎同有「小林志玲」之稱嘅老婆陳若儀舊年底生咗雙胞胎囝囝Jenson及Kyson，加埋之前大仔Kimi，已經有三條King在手，而Jenson及Kyson雖然只得六個月大，不過個樣同林志穎成個餅印一樣，可愛程度完全係爆燈呀！

有三個咁可愛嘅囝囝，林志穎梗係唔願出街留喺屋企啦！今日林志穎喺微博上載同三位囝囝嘅相，見佢哋趴喺地下玩緊，而身為哥哥嘅Kimi仲好有愛咁攬住細佬，真係望到都覺得好sweet！之不過一向有凍齡男神之稱嘅林志穎，喺微博笑言希望可以「返老還童」，問可唔可以做大哥哥：「午後陪弟弟們玩，我能當大哥哥嗎？」