石修催眠術技驚四座　網民搶住LOOP！

無綫向來人才輩出，昔日有「單手神人謝天華」及「飛簷走壁關禮傑」，喺劇集使出單手聽電話同飛天神技，近期再有「通臂神猿陳山聰」，單單用幾隻手指已經勾住牆身兼救人，認真厲害！不過，講到施展神技嘅表表者，一定要提石修，皆因佢嘅催眠術神乎其技，更被稱為「石修催眠術」！

話說，2004年播出嘅無綫劇《隔世追兇》最近再度重播，掀起煲劇熱潮，而近日播出嘅一集講述石修同郭晉安追捕駱應鈞，點知畀對方嘅手下發現，仲想殺死石修，勁牙煙呀！而喺「當時很危險，生命受威脅」嘅一刻，石修突然發揮神技，僅僅用一句說話「你流血了，你看看地上，一滴、兩滴、三滴」成功催眠對方嘅手下，令自己脫險。

網民模仿催眠術

你可能會問點解石修可以喺短短三十秒成功催眠人？皆因佢係心理學專家，識得催眠唔出奇，但咁短時間就催眠到人，真係大師級先做得到，難怪要封為「石修催眠術」啦！咁勁唔怪得大受歡迎，個個睇到都勁興奮兼一LOOP再LOOP呢幕，話最期待嘅畫面終於出現，有網友仲嘗試模仿「石修催眠術」，話自己老闆追問做晒嘢未，即刻講「一頁，兩頁，三頁」催眠對方，不過奉勸大家唔好亂試，衰咗就慘慘豬啦！

相隔七年再用催眠術

提到「石修催眠術」，其實石修相隔七年後，喺2011年播出嘅劇集《荃加福祿壽探案》第十集都用番同一種催眠手法，以一句「你鼻涕了，你看看地上，一滴、兩滴、三滴」對「動L明」戴耀明成功進行催眠，大抽自己水，同樣夠晒爆笑！

網民有話兒：

X樹宏：當年播呢幕時已經覺得好爆笑，好前衛嘅催眠術。

BeaXXXChan：返工時老闆問做好晒啲嘢未，同佢講：「一頁，兩頁，三頁」催眠佢。

YagXXXX：你睇緊留言，一個，兩個，三個。你已經畀我催眠。

AuyXXXXny：我最期待嘅畫面出現啦！

ChunFXXX：其實最好笑唔係呢個催眠術喎，係做乜要同個壞人解釋你點樣催眠條友？