港姐出身的王君馨（Grace）除了能歌善舞活躍於螢幕外，眾所周知她身邊有四位早年被封為無綫「處女黨」的好姊妹如岑麗香、苟芸慧、李亞男及鍾嘉欣。當中亞男及嘉欣相繼升呢做人妻，Grace卻沒有恨嫁的心，反而踩入商界，投資六位數字搞網店！Grace推出自家設計香薰飾物系列DearestGrace，當中的項鏈、耳環及手鏈等特點在於銅製的開合吊墜中可放入滴有香薰精油的棉花球，令香氣從飾物中散發及產生寧神安心之效。讀企業管理的Grace直言與飾物設計師Bell一拍即合，她大爆開業短短一個月即火速賺凸：「我哋籌備一個月就擺上網賣，好彩跟住第一個月已經賺番唔止六位數！」

靠姊妹攞靈感

開業即賺第一桶金，Grace稱會不斷擴展其飾物Collection繼續「吸客」。Grace指其創作靈感始於「Amazing Esther」的好姊妹，她稱起初只想為她們送上情人節禮物而已，旗下的Princess、Angel、Goddess、Queen、Warrior 飾物系列各自代表姊妹及自己：「好多謝佢哋，因為佢哋就係我嘅靈感！香香代表Princess（公主），佢份人好sweet同好可愛。苟芸慧就喺Queen（王后），佢好有氣質同貴氣。李亞男就係個好照顧你嘅Angel（天使）。至於鍾嘉欣就係非常靚嘅Goddess（女神）！我就係Warrior（戰士），從來唔係咩女神或者BB，我鍾意努力去Fighting。」

問她會否為男友設計專屬的飾物？Grace笑言對方打扮樸素不愛戴飾物。日後會否與主修經濟的男友夾份搞生意？她即撒嬌稱唔預男友：「情侶返屋企唔想講工作同傾盤數，所以我頭兩、三盤生意未必夾佢玩。如果我同佢第日結婚，梗係屋企為主，生意傷到感情就唔一齊做！」

主打平民路線

然而Grace作為創業「初哥」亦遇過令她陣腳大亂的挫折：「我諗住整首飾生意成本少，但之後要一批一批咁買材料就狂加成本。跟住有人試戴後敏感或甩色，我即刻免費退番畀佢，又攞成批貨去鍍晒K金成分，等批首飾唔再易甩色同敏感。（好揼本？）揼本但係值得，好彩外界好好反應！」她直言搞網店的好處是客源廣泛，她high爆表示客人遍及馬來西亞、中國、新加坡及美國等地。

諗頭多多的Grace更計劃與其他藝人好友舉辦聯乘Pop Up Store及開設顧客手工班，強勢宣傳自家飾物。Grace的香薰飾物主打平民路線，價錢亦相當「貼地」，僅花幾百元已能買下心頭好，她說：「我唔需要賣到幾千、幾萬蚊一條鏈。大家戴得開心同靚，又令自己精神啲同舒服啲，就已經好好喇！」