舒淇台灣搭火車　網友求偶遇

女神舒淇去咗台灣呀！今日佢喺Instagram上載一段自拍短片，一開頭佢不斷自言自語「火車火車火車火車……我們要搭火車…」仲表現到好緊張咁款！之後佢就影住火車開車一刻，鏡頭一轉，舒淇就同一大班工作人員勁興奮咁話「火車呀～！！」咁開心，唔通舒淇未搭過火車？

事後舒淇就解釋，話自己咁樣好無聊，佢話：「應該有很多人都坐過火車，我其實好久沒有坐火車，感覺還蠻興奮～」呢段片一出街，唔少網民都話好想飛去火車站搵舒淇：「哇！很想偶遇喔！」、「你要去哪裏？」此外亦有眼利嘅網民，發現舒淇正身在松山火車站。