撇低洪永城去飲　唐詩詠唔覺結婚係壓力

藝人唐詩詠到將軍澳出席「綠葉王」楊證樺和老婆沈可欣補擺喜酒兼為囝囝設百日宴。與洪永城（Tony）行蜜運的詩詠今晚卻「單拖」前來。訪問時，問到幾時到她結婚，她即笑謂：「要開始唔參加婚禮喇！講笑！不過其實都唔會因為參加婚禮而有呢啲決定，咁當然都戥兩位新人高興，但我暫時就仲未有呢個計畫。」

至於會有否結婚壓力，她就指開始有不少人問她幾時結婚：「但自己就唔會有壓力，因為都未去諗。同埋依家啲女仔好叻㗎喇，以前就話因為限定幾多歲要結婚同生BB，但依家條線都退後咗好多。（同Tony嚟會尷尬啲？）人哋都冇請佢，但一齊嚟都唔會尷尬嘅。」