傳吳業坤開紅館騷　林奕匡想做嘉賓

歌手林奕匡（Phil）到電台宣傳新歌《愛情小品》，透露：「以前都係出勵志歌，都係時候寫吓愛情歌，嚟緊隻新碟都係以愛情為主。（依家同女友太幸福唱唔到慘情歌？）愛情唔係淨係得慘情，仲有其他，例如懷疑、自卑等等。（女友係咪畀好多靈感你寫歌？）唔係淨係靈感，佢都畀好多信心鼓勵我，當我懷疑自己時，佢會話我得，佢仲話自己眼光好好。（你即刻冧晒？）係呀。」問到這首歌可是送給女友？他謂：「呢首歌我係唱對住佢唱，佢聽完都話好滿意，做到我哋目的，最緊要感動到佢。（結婚嗰陣攞嚟用？）未必，因為呢首係小品，結婚就未必夠。」

兩年內結婚

問到他與女友可有計劃結婚？他表示：「有計劃，但最近比較忙，我啱啱出國語碟，遲啲要去台灣工作，所以暫時理唔到。（計劃幾年內結？）呢兩年內。（順便今次去台灣影結婚相？）去台灣做嘢啲schedule係連瞓覺時間都冇。（咁今次做嘢女友會唔會去？）唔會啦，上年佢有跟我去，自此佢都知我去做嘢冇時間陪佢。」

唔急開紅館騷

另外，講到有傳好友吳業坤將於八月開紅館演唱會，對此他謂：「我未知，戥佢開心，等我陣間message問佢先。（你恨唔恨開紅館騷？）我啱啱做完騷，但未急切，希望有充足時間準備。」他亦謂如是真的話，都想擔任對方嘉賓：「有機會上紅館舞台點會唔想？」