林文龍宣萱回巢係好事　陳豪父親節陪女

藝人陳豪到沙田出席咖啡活動，他率先向傳媒預祝父親節，他說：「父親節快樂！（今年有囡囡陪過父親節好開心？）都係㗎，我好嚮往同小朋友一齊，因為唔想留低個女喺屋企，所以應該會喺屋企開個小型party慶祝。（唔肯賣甩囡囡？）一定啦！要一家人享天倫樂。」

茵媺快復出

被問到老婆陳茵媺（Aimee）早前在微博透露發燒，被Aimee尊稱做「皇上」的陳豪說：「佢係有少少燒，好番晒。（皇上點呵護佢？）全力以赴，做到最好！（Aimee幾時復工？）差唔多，等佢回復番狀態，佢仍然有個心喺度，對演戲有熱誠。（未收身？）慢慢，身體健康為主。（介意太太肥咗？）生BB係咁，呢啲係福氣。（皇上你幫佢審批工作？）有人幫佢，佢係皇后呀，我都要經過佢批准。」

「絕對幫到收視」

提到林文龍、宣萱將回巢無綫拍劇，陳豪說：「兩位我都未合作過，TVB缺演員，有資歷嘅演員、觀眾想睇嘅演員返嚟拍，喺觀眾角度係好事，多啲演員，多啲變化，絕對幫到收視。」