甄子丹休「戰」　意大利狂影老婆仔女

「宇宙最強」甄子丹喺外地忙緊拍攝新西片《俠盜一號：星球大戰外傳》，而子丹偷得浮生半日閒，難得呢個星期唔使拍戲，即刻帶埋老婆汪詩詩同一對仔女周遊列國，盡情享受家庭樂。

呢日佢哋去咗意大利佛羅倫斯，甄子丹全程充當攝影師，幫家人拍低美好回憶，仲將啲相放上微博，留言：「星戰這星期我休息，去佛羅倫薩（佛羅倫斯）意大利的第一天！」見佢哋又食又玩，又笑得勁開心，就知有幾享受個旅程啦！