ViuTV主持岑樂怡黃奕晨慘遭劇組遺棄

個性開朗的viuTV主持岑樂怡（阿妹）及黃奕晨（Dixon）近期接連有節目推出，當中與另外五位主持在節目《SE7EN》中熱血地實現各種夢想，不惜上天下海日曬雨淋，充滿青春活力，令觀眾也睇到「血脈沸騰」！講到合作難忘事，兩人笑言其中一集掛住買東西吃而跟攝製隊失散，非常搞笑！Dixon說：「當時拍咗十幾個鐘好攰，於是去咗買啲嘢食，點知出番嚟就冇晒人，幾十人嘅攝製隊走晒，要即刻打電話畀佢哋話漏咗我哋兩個呀！」阿妹說：「當時勁驚呀！我哋踎喺街邊等緊懲罰咁，好似兩個孤兒！」

講到對對方的印象，兩位開心果即笑不攏嘴，不停互窒，Dixon笑說：「我哋識咗三年，原來第一個印象好緊要，第一次見佢，佢係着晒村姑衫同化晒妝，好娘，自此都覺得佢係好娘！不過，識耐咗又發覺佢上鏡好靚好吸引…唔…當然真人唔係啦！哈哈！」阿妹則說：「開頭知佢係傻吓傻吓嘅男仔，到合作之後發現原來真係傻嘅，不過佢都細心盡責嘅，而且入行比我耐，會成日提點我。」Dixon笑說：「點解你讚我，我都覺得係窒緊我咁嘅？」

兩人「傻氣指數」同樣爆燈，非常投契，問到可有想過發展成情侶？兩人即耍手擰頭表示「諗都冇諗過」，Dixon說：「以前唔信男女之間係有純友誼，直至識咗佢，原來真係有嘅！咁我都當佢係女仔呵護佢，但真係冇可能，太熟喇！」阿妹笑說：「其實Dixon打籃球又生得高，都係我擇偶類型，但我鍾意鼻高啲，同埋真係冇Feel喎！其實我哋之間講嘅嘢好過火，冇咩遐想架喇！」

講到之後想再合作拍攝甚麼節目，兩人齊聲表示想開拍《SE7EN》第二季，阿妹又搞笑說：「我想拍劇，Dixon可以做我Gay嘅朋友，阿哥甚至阿爸！」Dixon即怒吼：「點解我要做呢啲角色呀？！我就想做真人騷整蠱節目，阿妹咁單純又蠢蠢哋，一定好易呃！」

場地：MAGE Kitchen