【壞事好事我會計】麥潔文原諒江華出軌

前輩歌手兼殿堂級歌唱老師麥潔文（Kitman）接受電台節目訪問大談往事，她提到於1991年轉投前亞視，因拍攝音樂特輯與藝人江華相戀，並於1992年秘密結婚，婚後育有一對仔女。

主動攞電話

談及當年與江華的首次接觸，Kitman直認主動認識對方：「喺遇到江華之前，我從未遇過一個令我心動嘅人，佢好特別，最重要係佢『唔滑頭』，唔會因為我係當紅歌手而對我卑躬屈膝，只專注做自己嘅事情。正因為佢份『真』，就吸引我攞咗佢嘅電話號碼，繼而約會就開始拍拖。」問到當時有否介意江華比自己年輕八年、甚至成就與賺錢能力比她少，Kitman說：「唔介意呀！我為人比較隨心，好少計算咁多。」

「唔能夠一做壞事就black list佢」

江華於1996年一度因為拍劇出軌戀上鄧萃雯，不少人好奇為何Kitman能接受丈夫犯錯，她說：「大家睇到嘅係我另一半犯錯，但大家睇唔到我另一半對我、對家庭做過幾多好事，我唔會張揚。呢個人做過幾多壞事、做過幾多好事，我會計，但總唔能夠，佢一做壞事我就black list佢。要愛一個人、放棄一個人，總唔能夠因為一個污點就放棄整個森林。何況當時兩個細路仔仲細個，我要顧及嘅唔能夠只係自己當時係咪甘心同氣憤，而下一個可能會令自己後悔嘅決定，所以我應該寬宏啲去睇整件事。」