【潮玩直播】陳法拉被小鮮肉「索吻」

34歲藝人陳法拉將於7月與黃子華合作演出舞台劇，最近頻頻為舞台劇綵排，而啱啱法拉趁住空閒時間喺Facebook同網民玩直播，吸引吓觀眾先！素顏上陣嘅法拉喺Studio介紹工作人員畀大家識，一開波有男主角黃子華現身，不過唔知點解子華用手掩面，仲十足個大細路咁周圍走，認真搞笑！

當中唔少工作人員都對鏡頭揮手，突然有一位高大兼青靚白淨嘅小鮮肉殺入鏡頭，法拉介紹呢位小鮮肉劉俊謙嗰陣都大讚佢靚仔、有才華，小鮮肉竟然大膽喺鏡頭前作狀錫法拉，不過大家放心，冇咀到落去嘅，法拉仲講笑話：「我同你阿爸有關係，唔係同你！」有關係？哦！原來小鮮肉喺舞台劇中飾演子華個仔，想嚇死人咩，亂咁講嘢！