篠崎愛包到冚慶祝入行十周年　粉絲嗌回水

上年被爆疑撻着韓國男團FT Island主音李弘基嘅日本G Cup水着女星篠崎愛，前晚以晚餐騷形式開粉絲聚會，慶祝入行十周年，穿上婚紗登場嘅佢，坦言平時着迷你短裙着得多，第一次着咁長嘅婚紗，話覺得婚紗太緊令佢抖唔到氣，佢仲透露話以前覺得結唔結婚都冇所謂，不過近日去咗朋友婚宴，開始覺得自己恨嫁。

而向來恨做歌手嘅篠崎愛，8月終於如願推出第一張細碟，佢喺騷上唱咗5首歌，換咗套及膝長裙，全程包到冚睇頭欠奉，令唔少現場嘅麻甩粉絲大叫失望，更有人留言話早知唔去睇，大嗌回水！