佢來自秦代！林峯唔識八達通搭港鐵

香港人平時搭得最多係咩公共交通工具？相信港鐵真係走唔甩！每日返工放工就好似隻蟻咁逼港鐵，打工仔真係諗起都心酸呀！咁如果話畀你聽，你呢一世搭港鐵都唔使畀錢，相信一般香港人都會開心都瞓唔着覺！但係講緊嘅只係一般人咋，男神唔計落去架！

「買港鐵自己揸都得啦！」

男神林峯早前出席港鐵活動嗰陣，就收到一張「一世通行車票」，冇錯，就喺嗰張你發夢都想要嘅「一世通行車票」，不過，男神似乎得物無所用！事關佢話過好少搭港鐵，仲爆出一句「唔知八達通可以用嚟搭港鐵」令全城嘩然！有網民就不滿男神實在係太過「堅離地」，竟然講得出一句咁離晒大譜嘅說話！不過，亦都有人力撐峯峯架！有網民就話表示其實唔識用八達通又有乜咁出奇喎？話晒峯峯都係「亞太區最受歡迎男歌手」，爸爸又係有「廈門李嘉誠」之稱嘅林華國，成架港鐵買番嚟自己揸都得啦，使乜「嘟」八達通呀？你哋班酸民咪嘈啦！

「佢秦代嚟架？」

不過，亦都有多痕友問咗句：「吓！八達通都唔識用，佢秦代嚟架？」咦...呢個時候就要響起一句「誰和誰，春秋都只聽天地號令～」佢真係秦代嚟o架！想當年峯峯喺劇集《尋秦記》入面做秦始王係做得幾咁深入民心，咁話明係秦始王，秦始王策騎架嘛，車都少搭啦，何況搭港鐵？所以「盤兒」（當時角色名）又點會識得用八達通呢？

不過，其實講嚟講去，最多網民嘅願望，就係既然峯峯都唔搭港鐵，希望佢不如送咗張「一世通行車票」出嚟抽獎啦！你就想呀！知唔知點解峯峯可以有呢張「一世通行車票」呀？網民話就係因為佢唔搭先送畀佢架，唔使蝕嘛！

網民有話兒：

Jonathxxx：地鐵（港鐵）！？咩係地鐵「港鐵」？快啲同寡人check下！

Roy Jxx： 你唔搭地鐵（港鐵），可唔可以比果（嗰）張一世通行車票我？

Andy xxx： 八達通同茄牛通有冇得雙拼？

Vivian xx： 就係知佢唔搭先俾（畀）張一世通行佢啦。

Gigi Cxxxxg： 咁有錢唔搭地鐵（港鐵）有乜咁出奇？對佢黎（嚟）講八達通可能只係用黎（嚟）畀泊車錢！