聞小艾大反應 祥嫂:崩口人忌崩口碗
已故慈善伶王新馬師曾遺孀洪金梅(祥嫂),及名伶吳君麗在北角新光戲院觀看廣州粵劇團主演的《封神榜 二郎傳奇》。
在新光戲院大劇場行政總裁李居明陪同下,會見記者的祥嫂顯得精神奕奕。李居明透露祥嫂是專程前來欣賞新馬師曾徒弟黎駿聲和彭熾權的演出:「祥嫂一入去,個個都叫佢做師婆,真係感覺到佢威力!個個都鞠躬!」他又指無綫未來會開設戲曲台,祥嫂因而非常關心頻道會否播出新馬師曾在慈善節目中的演出,李居明說:「佢希望唔好太商業,因為祥哥當年都係為慈善,所以唔想商業地推銷同拎嚟做廣告。(係收費頻道?)係,所以祥嫂有少少意見,希望用到祥哥片段最好同佢講一聲。」他又謂會將祥嫂意見轉達予負責戲曲台的何哲圖及丘亞葵,希望最後有雙方滿意的結果。問到有關片段版權誰屬,他謂:「應該就歸TVB嘅。」
至於祥嫂就直言丈夫的義演片段應該於免費頻道播出:「唔好吓吓都話要畀錢,TVB播如果收廣告費或者其他費用,我祥嫂都係唔同意,亦都覺得唔應該,咁大個機構都唔志在嗰多少啦。(唔叫小艾陪你嚟?)我邊叫得郁,仲係當年嘅祥嫂咩!見到面咪打個招呼囉!撞唔到咪當乜都好啦!哈哈哈哈!(同仔女關係好好多?)講呢啲好喇,通氣啲啦,祥嫂崩口人忌崩口碗。」之後她更反問記者自己是否比往日精神:「我豁達咗,你可以寫我明事理嘅!」