咁冧嘅？嘉穎認與陳凱琳靠雪櫃傳情

藝人鄭嘉穎及陳瀅於尖沙咀出席行李箱品牌活動。嘉穎被問到何時與女友陳凱琳（Grace）再去couple trip，他透露二人要密密開工：「我最快都要拍劇拍到9月，陳小姐就拍到十月，再決定啦！」

自認奄尖

談到他於活動上透露自己執行李時好奄尖，嘉穎坦言平時主要由助手幫手執行李，又自認大頭蝦多「甩漏」。問他有否獲女友幫手執行李？嘉穎說：「唔係工作上就再講啦，但我需要有人睇住。（私人物品如內衣褲都畀人執？）內衣着完掟落污糟衫袋，冇咩私人嘢唔掂得，內褲除外。」問他會否與女友用「情侶喼」？嘉穎笑言冇需要。

讚女友廚藝好

提到嘉穎日前與張栢芝亮相內地節目時，不慎將女友寫的「愛心便利貼」曝光，他笑言平時與女友以雪櫃「傳情」：「雪櫃張note寫英文咁細粒，放大都睇唔到，內容就唔詳細講喇。（女友喺雪櫃留言畀你？）雪櫃都好方便溝通，都係佢啲溫馨提示。」嘉穎又讚女友廚藝好：「當然好，佢多數煮西餐。（鍾意邊道菜？）樣樣都好！（佢上嚟你屋企煮定擺雪櫃？）可以咁講，太私人唔講。（你煮番畀佢食？）都有。」