港男複試　程可為姪仔食蕉消防員成大熱

星期一（4號）《2016香港先生選舉》首輪面試，當中有幾位令人眼前一亮嘅參賽者，今日第二輪面試繼續型仔見人！

上司支持參選

火速被起底嘅露股兼食蕉消防員梁裕恆（Flow Leung）繼續弗爆，成為風頭躉嘅佢，一身古銅色肌膚加純白色緊身tee「飛釘」到場，下加貼身運動褲示人。自爆胸肌有47吋嘅佢，被問是否已辭職全情投入參賽？他說：「未辭。（幾時？）未知！（之前放了食蕉相上網會剷走？）唔會，九成都係正評，冇問題！（上司有冇了解？）冇！佢都好支持我，仲搵我影相㖭！」

另一位都有睇頭嘅，就係甘草演員程可為嘅姪仔楊灌澤（Christian），佢以一身官仔骨骨look現身，粉色西裝外套加牛仔褲，可謂19歲卜卜脆！喺溫哥華返嚟嘅佢，面對鏡頭表現自信，更微微拉開外套仔，他表示今次來港參賽很有信心。問可有約可為姨見面，他說：「我哋有約飲茶。（阿姨醒你參賽招數？）冇！」之後佢仲大爆程可為叫佢要「聽話」㖭！其實Christian外型不錯，只是身材較矮細及表現怕醜。