港男複試　騎呢之選繼續有份

雖然已經經過第一輪篩選，不過依然不乏騎呢之選，當中包括一位貌似許志安嘅參賽者，名叫Thomas，被現場記者問到覺唔覺得自己似對方時，表現尷尬，拋下一句「冇人話過似！」就走人。

至於以紅色吊腳褲現身嘅Freeyon，27歲，自稱係演員，係其中一位「加拿大種子」，佢仲曾經揮低程可為姪仔楊灌澤（Christian），拎咗《型男家族》選舉冠軍，不過佢今日嘅打扮略為MK。

另一位參賽者Alex，報稱係一位dancer，教芭蕾舞，本身今日佢以「純情王子」look見人，係幾斯文大方，不過就唔知點解，佢條瀟洒白褲仔透咗條豹紋底底出嚟，真係wild到呢！

而着粉色恤衫嘅Karl，19歲，有個酒粒仔，不過見記者時就無啦啦點住腳尖擺甫士，非常嬌俏，似乎係一名得意仔。