逾十年冇合作　梁小龍撩米雪拍愛情戲

藝人米雪、梁小龍、白彪及顧冠忠等於尖沙咀出席簽約活動。米雪透露將與眾人到河北出騷宣傳鹽山武術節，齊齊表演武術及獻聲。她稱考慮屆時與白彪等於表演中「重現」經典角色「黃蓉」及「郭靖」。米雪又稱與另一好友梁小龍已逾十年冇合作，她心思思想與對方拍打戲，而梁小龍則撩她「談情」：「我哋拍愛情戲都得㗎！」

他表示早於內地設立工作室，目前埋首寫劇本，更曾推掉八部電影邀請：「內地市場好大，我今年都推咗八部戲，時間唔夠，武術指導當我廿五歲。佢哋睇我戲大，入行後見到我就想話我知佢都好勁，但佢哋向我示範完動作，連佢自己都喘晒氣。我就問佢哋幾歲，佢哋答我廿五歲，但我係佢哋嘅年歲調番轉！」問到梁小龍會否有興趣到無綫拍劇？他笑說：「當然邊度有人請我都會開心去做，最緊要價錢。（米雪話劇本好都重要？）就算劇本唔好，我哋都做得好咪得！」