Keep住合作　鄭伊健爆周秀娜係神婆

藝人鄭伊健和周秀娜（Chrissie）出席鞋履品牌旗艦店開幕，二人齊以運動造型上陣，Chrissie還大騷小蠻腰及腹肌。伊健表示自兩人自從在鄭丹瑞的電影合作後，便結下合作的緣分：「有一齊做吓活動、拍戲咁。（厭未？）未厭，好耐冇見啦，有合作，不過係間斷咁合作，隔幾個月或半年。」Chrissie亦表示想不到二人合作出來的效果幾好。伊健續以「神婆」來形容Chrissie：「佢話我哋嘅時辰八字ok。」Chrissie補充說：「我冇check過，所以覺得好似魔術咁神奇。」

叫周秀娜增肥

伊健透露二人合作拍攝的網上電影《我的極品女友》昨日首播，反應非常好：「第一次拍網上電影，係香港新導演嘅，係一個試驗，估唔到成績唔錯，我哋都係做情侶。（片酬如何？）其實唔錯，同埋我哋都係今日先收到消息，知道點擊率好好，係網上收費嘅，我哋冇分紅，神婆話我哋時辰八字ok。（再合作就加價？）冇諗住加價，好玩就得，不過佢（Chrissie）要增肥先。」Chrissie即說：「我頭先都係不斷收腹咋，佢（伊健）成日做運動咁fit，又要拍佢做嘢，又知今日件衫係露腰，所以食少咗嘢咋。」

嫌周秀娜姐手姐腳？

問到二人再合作，除情侶外，還會想飾演甚麼角色？伊健即故作可惜說：「我本身覺得佢姐手姐腳，估唔到佢拍動作片ok，連武指都讚佢，我就試得多（動作片），同佢未試過，操得咁fit，冇導演欣賞佢。」Chrissie即反駁說：「我啱啱先拍完一套，全女班，講打講殺，負能量好勁，今日見到『男神』，正能量返晒嚟。」

避談生仔話題

伊健續透露完成了《友情歲月》的巡迴演唱會，現正放假中：「嚟緊會做新嘗試，不過未講得，要操fit吓，準備吓同進修吓自己。（咁生仔呢？）又講？年年都問，講番tour成百人，做咗廿幾場，要搵地方答謝大家食餐飯，值得鼓勵。」