被質疑危駕　蔡思貝認冇睇道路標誌

蔡思貝下午在將軍澳電視城開工，拍攝劇集《心理追兇》，講到日前在金鐘撞車片段曝光，她說：「我都睇咗，上次活動都講咗發生咩事，係因為我唔太熟路，所以導致意外發生。（有人質疑你駕駛態度？）我唔熟路，以為可以轉右，所以撞到。（唔熟道路標誌？）我嗰日冇睇到。（改進駕駛技術？）會留意多啲，會睇清楚先做決定，以後會留意多啲道路標誌。（同的士司機、乘客有聯絡？）經理人同佢哋聯絡咗，我都有一路跟進情況。（賠償？）暫時未知，對方都未覆番，仲商量緊。（第一次撞車？）係呀，第一次撞車。（警方會唔會起訴危險駕駛或不小心駕駛？）未知，未收到通知，暫時未有再聯絡我。（會唔會唔揸車？）唔會，唔可以斬腳趾避沙蟲，今次係自己經驗唔好，下次會小心啲揸車，經一事長一智。因為有時（凌晨）四點先放工，唔揸車唔得，呢排會搭的士先。（你架車整緊？）未知，報緊價，可能買架新車。」