一穎唔使喊喇！陸永爸爸返嚟喇

歌手陸永近日飛到英國工幹，一飛就飛咗成十幾日，之前陸永就喺instagram透露，大女陸一穎掛佢掛到喊晒口，個樣仲要超「慘豬豬」話：「我好掛住爸爸！」真係令到唔少網友大叫心痛呀！

望穿秋水，陸永終於返嚟啦，陸永老婆Rainah即揸車去機場接機，真係sweet到爆，仲要啲時間啱啱好，陸永仲可以接埋兩個女放學，齊齊返屋企。相中所見，陸永仲好貼心咁拖住兩個女返屋企，而Rainah即刻影低呢一個咁有愛嘅畫面，唔少網友都話辛苦晒陸太接送，仲話見到呢個畫面，真係覺得陸永係一個好爸爸同老公，真係隔住個mon都feel到sweet！