滕麗名否認同胡定欣不和：我哋好團結

藝人滕麗名最近憑劇集《一屋老友記》人氣急升，成功挽回不少觀眾心，更被推選為今年「民間視后」及女神，阿滕呢舖真係乜都返晒嚟！人紅自然有新聞、有是非，對於有指她因鋒頭蓋過胡定欣，而遭對方嬲爆，更令定欣多次缺席活動，而定欣今日接受《東網》訪問時，坦言純粹之前不在港，而本月20號，她都會出席《一屋老友記》宣傳活動，不過今次郤輪到阿滕不能出席。

阿滕接受《東網》訪問時坦言：「因為我要去北海道拍一套大陸劇，我都好希望同劇中演員一齊玩，不過因為個期一早度咗，之前我好早都已經同監製講咗呢日唔能夠出席。（怕唔怕到時又話你避開唔同定欣同場？）呢套劇係因為我哋咁團結、咁合群先咁收得，我哋呢套劇冇小圈子、亦都冇是非，再撩都冇用。」

對於被封為「女神」，她笑謂：「真係唔敢當，好多保養得好嘅女神大有人在，我哋只不過話畀一啲同我哋歲數相近嘅觀眾聽，四十又如何、五十又如何，都可以活得好開心、好美麗，唔好叫我BB就得，我驚我啲雞皮打唔番入去。」