黃心穎死唔肯講有冇拖拍：影到相先囉

藝人黃心穎、朱千雪及鄭俊弘到九龍塘出席活動，心穎家姐黃心美，日前自爆被心穎及單立文迫去相睇飯局，心穎對此笑謂：「我又唔算係瘋狂咁介紹，豹哥（單立文）就有，其實都係擔心佢冇人照顧，想佢有人take care。（你都相睇埋一份？）我未需要住，工作為主先！（心美仲需要時間治療情傷？）佢好番晒，係未遇到啱啫，我有幫佢過濾，我清楚佢要啲咩，邊啲適合佢，佢冇特別要求，我相信我眼光佢會認同，其實圈內外都有人想識家姐，但我唔會講係邊個。」

心穎又爆美國之行有艷遇，她說：「我遇到好人，我喺LA，有日遲到咗個tour，但酒店有個男士好好話車我去，我後尾都有畀貼士。（有冇得發展？）感情我唔急，工作已經夠忙。（係咪拍緊拖，唔對外講咋？）唔知呢？點問我都話唔係，影到相先囉！」