拍拖6年第一次　蔡依林孖錦榮甜蜜合照

台灣天后蔡依林（Jolin）前晚（16日）喺馬來西亞舉行嘅《我呸PLAY》巡迴演唱會最終站時，因天雨關係不慎喺台上跌倒，不過好彩冇大礙，最終完滿結束！唔知係咪嚟到最後一場，想送啲驚喜畀大家，佢嘅官方粉絲微博就甫咗張佢同男友錦榮嘅合照，令粉絲相當滾動呀！

Jolin一向低調處理感情事，佢同男友錦榮拍拖6年嚟從未試過喺網上甫合照，只係間唔中畀人影到佢哋拍拖，而今次竟然係兩人真真正正嘅合照！見到Jolin同錦榮非常有默契咁托住個頭坐喺度擺出一樣Pose，Jolin喺高大嘅男友身邊，都變得小鳥依人咁，完美示範「最萌身高差」！唔少網民都話好難得，佢哋終於公開合體晒恩愛喇！