古天樂手多多摸「佘籮」

女星佘詩曼在新片《使徒行者》中再度與古天樂合作，二人在《衝上雲霄》電影版時已經合作過。今次合作帶來更多火花外，更有不少辣身動作戲，二人互相猜度臥底身份，為試探對方而放手畀古仔任摸索臀，令目擊一切的吳鎮宇睇到眼火爆！談到這場戲，阿佘笑言不會尷尬，大讚古仔是正人君子，阿佘笑稱：「我PAT PAT一直喺度，又唔會走位嘅！」

叫阿佘着泳衣

古仔笑言阿佘的演出令他印象深刻：「全部同阿佘嘅戲都喺澳門發生，所以今次同佢合作機會唔係好多。而且我全部都玩佢咁嘅，有次又要佢要着泳衣，其實係我整蠱佢先叫佢着泳衣，特登畀錯指令佢。第二場戲係喺賭場，我知佢跟緊我，又想玩吓佢，就有少少輕薄佢嘅感覺。另外，仲有佢同我一齊去打飾演女殺手的韓籍女星Clara（李成敏），雖然阿佘嘅出現其實愈幫愈忙，不過都好多謝佢同鎮宇有出手相救嘅。」

打到周身傷

不過相對之前的泳池演出，阿佘今次穿上一件頭泳裝，被拍檔吳鎮宇笑言「惜肉如金」，但原來是為了遮瘀傷，阿佘笑說：「雖然露得唔多，但因為拍攝泳裝前一直拍打鬥場面，整到周身瘀傷，所以一直擔心拍呢場戲時會有多處瘀傷，搞到好似被人虐打完咁！好彩隔咗先拍呢場戲，瘀傷好番晒！」