韓星宋慧喬出席Prada香港廣東道專門店重新開幕酒會，在場一早已有二、三百位宋慧喬粉絲圍觀，場面墟冚！身穿透視黑色短裙的她甫出場即惹來尖叫聲，她受訪時表示很喜歡香港這個城市，續說：「Prada係我好鍾意嘅品牌，所以好期待，又可以見到粉絲們。」

啱啱度完假

剛度假回來的她，唔知係咪放假太開心嘅關係食多咗少少，今日身形似乎發福咗少少，她透露早前與同事去了韓國濟州島旅行：「玩得好開心，仲去吓其他地方。（仲有邊度想去？）紐約、巴黎、意大利。（鍾唔鍾意陽光與海灘着泳衣？）我好鍾意去海邊，但有少少驚水，游水會去游泳池。」當記者再問她是否喜歡穿泳衣，在旁的翻譯則代指不答。

希望下次見到偉仔

提到內地選其為亞洲十大美女之一，她聞言後表現驚訝，並開心謂：「因為係演藝界有好多靚人，各有特色，特別係後生嘅好清新，多謝粉絲、各界咁關注、咁睇好我！」談及影帝劉青雲表示想跟她合作，她表示暫未見到青雲本人。問到會否約見好友梁朝偉？她表示是次很可惜未有機會見到，希望下次可有機會。